Festeggiamenti per la Madonna di Gulfi
Di seguito il cuntu della tradizione sui festeggiamenti per la Madonna di Gulfi, tratto dalla raccolta intitolata Accussì di Carmelo Campanella.
Tuttu l’annu si parra a Ciaramunti
veni la Pasqua ca assuma Maria
li cosi santi si trovino appuntu
e ‘nmisi avanti s’arorna la via.
Quant’è gluriusa Maria r’unnè ca passa!
Assentata ci stapìa na santa missa
r’unni passa Maria ciantu ni casca
e Lucifiru ri lu ‘nfiernu si subissa.
Subbissa lu piccatu quannu acciana
Maria ca a tutti quanti ni pirduna
e pirdunannu lu luni onuratu
ca l’urtulani lu tienine a vutu.
Ci fanu torci cu bell’apparatu
ca cu sururi ri sancu l’ana sciutu
la festa ri Maria cu l’avanzatu
viva ri Cristu è lu primu salutu.
Salutannu a Maria agghiorna lu marti.
Li mulinari n’avanza cu potti
faciennici a Maria di bedi parti
abbampa lu cori sò, finu a la morti.
Oh! piccaturi avanti ca ti sparti
addumannici la razia pi la morti.
Ora c’agghiorna lu mercuri agghiorna
la Matri santa la vuogghiu lodari.
Cu fa la festa a la devota ronna
tutti aunuti a cu la pò avanzari
cu ci la fa cu amuri si la sonna
la Matri santa ca ni vò sarvari.
Sarvatini o Maria a li picurari
ca fanu festa agghiurnannu lu iuovi
e spienninu munita e gran rinari
e accattino cosi santi e torci nuovi.
Patri Antuninu na lu priricari:
-Oh! Miatu Ciaramunti chi ti truovi
la Festa ri Maria nun la lassari
ca ti servi pi l’arma quannu muori.
Ora ca agghiorna lu venniri agghiorna
ci fanu festa tutti li purcari.
Maria, ca tutti li purcari li vò beni,
ci cunceri la robba e lu campari.
Biniritta dda iurnata quannu veni
ca passioni ri Diu si po’ciamari,
la luna avanti e li stidi sereni
lu Pararisu ri presenza pari.
Ora ca agghiorna lu sabbitu santu
devoti iurnatari stati attenti.
Lu visu ri Maria straluci tantu
oru culatu cupertu r’argentu.
Quant’è beda la cruna e lu sò mantu!
Sia lodatu lu santu sacramientu,
sacramientu divina maistati
ruminica vasciddari vi scriviti.
Li vasciddari su li ciù anurati
ca fanu torci comu li vuliti.
Lu peristallu ri oru culatu
Oh! Matri santa ni biniriciti.
Biniriciti a lu secunnu luni
ca fanu festa tutti li massari.
L’armuzzi santi stanu addunicciuni
c’è la sò parti, nun ci pò mancari.
Cu fa la festa ‘nta li finituri,
agghiorna lu marti e su li urdinari.
Maria ri Gulfi a lu miercuri parti,
ri quindici uri è misa la via.
Lu peristallu ri oru culatu
cu la raia ri lu suli stralucìa.
Patri Antuninu pi Maria fu natu,
Viva ri Gulfi ! Oh! Beda Maria!
